الضحكة مكانها صورتك

الضحكة مكانها الصورة

حاجة غريبة أوي علطول لما بنيجي نتصور لازم نقول كلمة واحدة " إضحك "

الصور بتسجل لحظات حلوة في حياتنا

وساعات بتسجل أهم خطوات في العمر

حب

نجاح

لهفة

شوق

إستقبال الغايب

ومن ناحية تانية

الصور دية بتقولنا أن مهما آسينا في حياتنا

أن كل ده هيعدي

بدليل الصورة دية

صورتي بضحك فيها

وكاني بتحدي العالم وبقوله ياقدر هون علي نفسك بكرة بتاعي احلي

علشان أنا فيه

بعد ما بندوق إحساس الدمعة المكتومة

والقلب المكسور من حب مجهول

والفراق اللي مبيتعرفش نهايته لأن بدايته مخترنهاش

والحلم اللي بيتوه من زحمة الدنيا

بتيجي فرحة غريبة

مش عارفة مصدرها إية

بتخلي دمعتك ننزل

وتغسل قلبك

ساعتها بتحب تتصور

علشان الصورة هنا

مرحلة جديدة وصفحة جديدة

بنحب السما والمطر والمية والوجه الحسن

دول كلهم أهم موضوعات للصور بس الأهم

أنت

صورتك أنت أو أنتي

لية مثلا لما بنبقي قاعدين لوحدنا بنبقي مكشرين

وبنفتكر كل هموم الدنيا

وخصوصا أهم حاجات فشلنا في تحقيقها

يااااااااه ملامحنا بتبقي غريبة

بس زي ما ملامحنا ممكن تتغير في ثانية

والفم يفتح علي آخره ونبدأ في الضحك والإشراق من جديد

الحاجة اللي مش بتتغير بسهولة

إية الحاجة  ياتري اللي مبتتنسيش في صورة الواحد مهما أتغيرت ملامحه

وضحك مثلا؟؟

عينه

نظرة العين عمرها ما بتتغير

أي حاجة ممكن تشيخ ماعدا العين

في عيون بتضحك وعيون بتكدب

وفي عيون مشاكسة وعيون حزينة

بس بردة اللي عمرنا ما بننساه في الصورة أنك تضحك

علشان الضحكة مكانها الصورة

بقالي كتير مضحكتش جوه صورة

ياتري مين تاني مضحكش جوه صورته

؟

سواء اللي بكاميرا عادية أو كاميرا الحياة

حواديت بنات منسية لصاحبتي أسماء

أنا

أنا الضي والعتمة أنا الشمس من ورا الغيمة أنا الحرف اللي وقع من بين سطور كلام العاشقين أنا السم اللي فلعسل السايل علي شفايفك أنا البحر وسط الصحرا أنا شجرة لمون بيحوطه الشوك أنا نسمة هوى مندية فحلم ليلة صيف أنا الحبة اللي فبطن الأرض تروينى أزهرلك تسقينى قسوة وجفا بردو تلقينى انبتلك وردة بلون الدم ماليها الشوك ولساك بتسألنى أنتي مين !! هرجع وقولك من تانى أنا الجنية اللي فحوديت المسا المرعبة وأنا الأميرة بجدايل مضفرة فحدوتة منسية من حواديت الصبا وانا النبع الصافي اللي منه العشق ارتوى أنا النجمة المغزولة فشباك السما وبردو لساك مفهمتش مين أنا

تلك الطفلة

كانت هي تلك الطفلة التي ماذالت تركض في أرجاء المكان ولكن بعد اختلاف الزمان ، إتهموها بالبغاء وكانوا بمنتهى الغباء ليعتقدو أن ملامح الطفولة البريئة قد غادرت وجهها الملائكي ، لم يرو إلا الخطوط المتجعدة التي رسمتها أحزان الحياة علي وجهها الصغير ، تلفتت يمنة ويسارا وهي تعدو الطريق خافت ان تدهس تحت أقداما وحشية همجية ، كانت تعلم جيدا الي اين هي ذاهبة ولكنها لم تعلم اي طريق يجب ان تسلك ولذلك كثيرا ما ضلت الطريق وتخبطت في تلك الدروب المظلمة التي تملؤها الأصوات المخيفة وذلك الصوت ، صوت تخبط الرياح في أغصان الشجر ليلا ؛ يجعلها تمثال صامت لا حياة و لا نبض فية ، وعندما تهدأ الرياح وتختبئ كل تلك الأصوات خلف الشعاع الفضي ، تركض الي تلك البحيرة ، تلك البحيرة المتلألأة في ضباب الليل تنصت في سكون الي كلماتها المتدفقة من بين هاتين الشفتين الصغيرتين وهي تحكي ما مرت به في الدروب المعتمة فتغافلها دمعتين تهربان من عينيها ليسقطو في أعماق تلك البحيرة
.

رماد حياة

آه من طيارة ورق من ايد الصبي فلتت حبالها والريح خدتها شرقتها وغربتها ، وآه من عروسة خشب في أيد صبية جمالها عجب لما كبرت رمتنا فصندوق اسود خشب ، وآه من سجارة بين شفايف متوهجة دخنها راسم أشباح فلهوا ملوية فلحظة تلقاها تحت الجزم مطفية ، وأه من دم سايل توب العفة بسم الشرف نجسوه ، وآه من يمامة بيضا وسط غابة شوك وقعت وجنحها أتكسر ، وآه من كتاب بالتراب اتردم فكومة كتب منسية ، وآه من مرايا تبصلها تلقا شعر ابيض وأحزان العمر علوش مخطية ، وأه من طريق يضيع فية الحبيب ويتوه فية الصديق ، وآه من مركب ورق فعرض البحر بتعافر تيجي موجة وتغرقها ، وآه من نجمة فسما نورها يزغلل العين يطلع النهار تصبح مطفية

مين اللي بني مصر ؟! أحمد عز ولا عم مصري عز

اللي بني مصر

كان

في الأصل

؟؟؟؟؟!!!!!

حلواني - نجارين - حدادين - حرامية

بسم الله الرحمن الرحيم

الإجابة الرابعة

حرامية

طبعا أكيد مغشتش الإجابة من أي حد ده بمجهودي

زي مجهود المعلمين في إختبارات الكادر الجديد
المهم
نيجي بقي علي القطط السمان
رجال أعمال مصر المحروسة

رجال الأعمال في بلدنا الحلوة قالوا عنهم رجال السياسة
عماد البيت وحيطانه

بس في منهم معجبوش الحيطة هنا وقرر يروح سويسرا يصيف

وخد معاه مصروفه

زي الريان بعد إتفاق العمالقة بينه وبين أشرف السعيد

رامي لكح ممثل الشعب لما ديونه وصلت ل 600 مليون و خلع

والقائمة طويلة

ناس تانية شافوا أن مصر هي أمي ونيلها جوه دمي وفلوسها في جيبي وكرشي

زي ساويرس وأحمد عز وأحمد هيكل

الخ الخ الخ ...

أنا مش ناوية أعمل دعاية ليهم لاسمح الله

بس أنا خرجت من رجال الأعمال دول بحاجتين او ملاحظتين

الملاحظة الأولي

إرتباطهم بالمطبخ السياسي وأكيد الجانب المهبب

علشان الشئ لزوم الشئ

فمثلا الريان بجانب عباءة الدين الذي أعتمد عليها

سانده العديد من الشخصيات السياسية والاقتصادية المشهورة

أحمد عز اللي أصبح الكل في الكل في البلد اقتصاديا وسياسيا

وعلي رأيه هيا ديه الديمقراطية

ساويرس الخاصل علي لقب

" ملياردير قبطي في مجتمع إسلامي وشخصية عامة لا تعمل تحت إبط الحكومة

الملاحظة التانية

إزاي الناس دول حرامية

زمان كانوا بيقوللنا محدش يقدر يسرق حلم

سيبونا من المقولة دية دلوقتي

رجال الأعمال المصريين دخلوا الحكومة ومجلس الشعب

علي أساس أن الفترة اللي جايه

كلها خصخصة

وبيع كل حاجة وشرا أي حاجة

أبتدت عمليات الخصخصة وتضمن 176 شركة

وفي الاخر ضحكوا علينا بإعلان

" الإستثمار يعني عمار

رجال الأعمال مسرقوش فلوس بس

وهربوا بيها

دول قدروا يسرفوا أحلام وأماني عم مصري عز

عمال .. وشعب ...وشباب كانوا كل فكرتهم عن بكرة حلم بسيط

العمال اللي أصبحوا فجأة عبء ولازم يمشوا

مش مهم إزاي بس باي باي

الشعب اللي فقد الدعم بتاعه وقالوله باي باي

الشباب اللي متأكد أنه مالوش شغل إلا بعد حين

والعلم عند الله

وأكتب علي ضهرك مغلق للتحسينات

ولما تبقي كفء زي بتوع برة ابقي تعالي

مش هقدر أقول إني بكره النظام الرأسمالي أو بحبه

ومش هيا دية المشكلة زي ما بيفكر فيها بعض المحللين

المشكلة

أو الحل
 إضرابات المحلة والإضرابات في مصر اللي 

بتعبر عن حاجات مش حاجة واحدة

الظلم

الفقر

الكبت

أسر وعائلات شافوا نفسهم عارين من أقل حاجة

ومفيش سبب

أو السبب قليل بالنسبة للحرمان من لقمة عيشهم

طلع ينفع تسرق حلم

وتاكل حق

وتكتم شعب

وتحرق فكر

أكيد النظام كله فاسد وهو ده الإطار اللي بندور فيه

ورجال الأعمال بيعملوا فيه اللي نفسهم فيه

أنا اتهمت رجال الأعمال بأنهم حرامية

حرامية فلوس وعقول

عشان مش بقوا يكتفوا بالتهليب

دة بقي تهليب وتغييب

أكيد بكرة مش أفضل

ومش نحو غد أفضل

علشان بكرة

بتاع أحمد عز غير بتاع عم مصري عز
الأول بيفكر

يعزم السيد وزير الداخلية علي الغداء والتاني بيعزم السيد الأمين

بس الفرق إن العزومة الأولي بمزاجه ونفعني وأنفعك

والعزومة التانية بالجزمة

لك الله يامصر

ولنا الله ودعاء الوالدين

نيجاتيفهم عار علي مصر وواقعها وتاريخها

وتستمر الإعتصامات والإضرابات

علشان الحيطة

وقعت من الأسمنت المغشوش

ولازلنا مش هنيأس نحلم بكيس فيه عصير قصب

نيغاتيف حياتنا

صورة لفلاح في أرض مأجرها وعليه إلتزمات الدش والريسفير
تحقيق في مسودة مطبعة جريدة قومية ولسة رئيس التحرير بيشاور عقله في النشر أو تحويره
طالب في محاضرة لعلي الدين هلال أو محمد كمال وبيتكلموا عن التحول الديمقراطي لمصر
مواطنين بيسجلوا في موقع شارك لجمال مبارك وعمالين يغيروا في الخلفيات علشان متنكشفش لعبتهم في لعبة " شارك " أون لاين

شباب غير شباب النيل بتوع الإعلانات بيتقألهم _عذرا_ فوت علينا بكرة مفيش شغل
واحد ماشي في الشارع وقع في كمين شرطة واذا بيه متهم حتي تثبت براءته أو متظهرش مش مهم
أصحاب قاعدين مش بيعملوا أي حاجة ويتقبض عليهم " أمن دولة" للاشتباه
شباب أحزاب في دورة لحقوق الانسان وبالرغم من ديمقراطية الدورة إكتشفنا ان مصر مش بتاعتنا بتاعت الناس التانية
مرشد بين الطلبة لمعرفة إية احوالهم واخبارهم واخرهم إية مع اللي حواليهم ؟!!!
واحدة مسلمة نفسها وهتموت وتقلع حجابها والسبب الوحيد اللي يمنعها أخوها اللي لا يمكن يسمح بكدة وهيا بتقلعة برة لإقتناعها بحريتها
نميمة لبعض الاصدقاء حول أوضاع الشواذ في الخيلج وهو ما تحول لأمر عادي وطبيعي وتعتبر متخلف لعدم معرفتك

حاجات كتيرة
وأحداث أكتر
صحيح عارفنها وبنقرأ عنها
أو حتي بندردش بيها مع صحابنا
بس كلها
نيغاتيف
شريط طويل من الحقائق والوقائع
بس مش منشورة
او محظور نشرها
او عذرا لا يمكن نشرها لاسباب مهلبية احنا مش مدركنها دلوقتي علشان مخنا صغنن
نيغاتيف حياتنا
لسه مش بيانله شمس أو حتي قمر
بس حتي لو النيغاتيف مظهرش
والصور متحمضتش
النيغاتيف هيفضل
دليل علي :
عم مصري الأصيل اللي مش هيسيب بلده ولا حقه علشان زهق من مضايقات عم الأمين
ست نضال اللي هتفضل تكتب وتقول اللي هيا عايزاه رغم أنف ايتها حد
سعادة الاستاذ اللي اتخرج بتفوق ومش هييأس أنو يتعين معيد حتي لو ابن الدكتور هو اللي اتعين
دكتو بيلف مصر ومحافظتها ومهما كانوا خايفين من أفكاره وتوليه المنصب الهمام هيفضل زي الشوكة ودليل علي جهل النظام

الخوف اللي جوانا من أننا نكتب أي حاجة وكل حاجة بنقابلها غلط وساكتين
النيغاتيف
أنا ناويت أحمضه
ممكن ده يكون الهدف من المدونة
مش عارفة
وجهلي ليست أمر حصري سوف تنشره الس ان ان فلا أدعي المعرفة والعلم
الأمر الوحيد الأكيد
نيغاتيف
أمر جديد بالنسبة لي